じゃんじゃんじゃんじゃんじゃんじゃんじゃんじゃんじゃんじゃん～～涼宮春日入手!
放左工後,摩下摩下去到巴士站,諗住搭架914,舒舒服服咁去到sogo上的旭屋書店買涼宮。
一條友地企係度排隊等巴士,等左十五分鐘,架車仲未到,好焦慮,四圍望,俾我望到塊牌話有兩架巴士要改道.
[914,968,改道]
914,係即係我等緊果架?
要改道?幾時啊?應該係聽日雙十節吧.個心係咁諗:好彩,今日係滿清last day(一百年前)
再睇真D,10月9日!!!10月9日!!!10月9日!!!10月9日!!!10月9日!!!
頂!咁點改法?灣仔消防局,利舞台等等六個全部取消,直接到天后總站停車.
頂!咁你仲開黎做咩野,最重要果D站全部無晒,仲搭黎把鬼啊?
好慶!原來乖,係無用架.原來等,都係無用啊.早知我頭先同jason佢地去太子搭地鐵好過.
我就唔想地鐵轉來轉去先至黎搭巴士.而家又要我跑去奧運搭地鐵.灰!
為左涼宮春日,我忍!
我轉身離開巴士站,見到條人龍仲係傻下傻下咁等,心諗:你地真係傻,到而家仲未知要改道..
黎到旭屋,冰涼的冷氣,清靜的環境,真係同出面的塵囂,吵雜的地鐵無得比.爽!
偶然傳來幾聲輕柔軟熟的日語,真係咩野怨氣都跑到九宵雲外。
黎到輕小說部,即刻抽起[涼宮春日的消失](系列第四),天啊,就黎到手啦.我憋了幾日.
自從幾日前睇左涼宮劇場版[涼宮春日的消失]之後,我成個腦都係呢套動畫,半個心都俾左長門有希lo.
我敢話,呢個劇場版,係近十年最好ge劇場版,亦都係我睇過最好的劇場版.
無論係光暗,倒影,場景的細緻真實,2D同3D的配搭,適當的立體感,都係當今動畫界的極緻.
論動畫製制技術,無一套可以與之相比.無.真係無一套可以同佢比.如果有,你即刻聯絡我,我電話9X1X5X6X.
再加上谷川流的原小說真係寫得好好,係呢個系列最好的一本(網友話).
咁我諗我無理由唔買LO.我山長水遠,搭地鐵,過大海,就係為左你ja,涼宮春日.唔係,應該話係長門有希至真.
睇完劇場版,我真係唔對你完全改觀.
你唔係人形電腦,你真係一個活生生的人.一個會害羞,會紅臉,羞羞澀澀的文學少女.
我天生就對文學少女無抗疫能力,學名全稱後天文學少女免疫缺乏症候群.
仲有,你為阿虛做左幾多野,大家知唔知?
渡過15031個無盡而重覆八月;
為佢擋刀擋槍仲要擋埋激光,連眼鏡都碎埋.你幾多度近視,仲唔快D去配返!
七夕,佢地兩個去時空旅行,要你去補鑊;臨近聖誕,時空錯位,又要你去補鑊.
你做夠未?
你厭倦了,你要改變世界,無問題,我諒解你;
但你選擇改變全世界都唔改變阿虛,仲要俾佢自己揀,你真係對自己好殘忍lo
世の中で、君に誰でも愛することをしないなら、僕は君に守る。(呢句只有你聽得明就好了)
其實本小說我拿到手真係唔算睇到好明,D字都唔淺啊,唔夠十五分鐘我就開始離魂.
無辦法,落去寫樂堂買中古漫畫.好彩成套(12本,未完)仲係度,新簇簇,只售$450.除開每本都唔使四十.抵!
從櫃員機拿出來的五百元大紙,我對住佢說:
さようなら,你唔好怨我.我都係無得揀,鬼叫呢個世界上有咁多五百蚊紙,部櫃員機偏係要嘔你出黎.
你無得揀時,我都無得揀.你的天命就係同我贖翻套涼宮翻黎.bye~~
交換後人質後,套涼宮春日就到左我手上了。
肚餓。
其實我最後一站通常都係去888食拉面.
仲記得上個月中秋迎月果日,去到888爆棚,之後傷心酸辣粉,又爆棚,好灰,未食已經好傷心.
之後自己一個去七仔買罐朝日,自己隊,夠晒淒涼.
今次黎到有位wo,仲唔使同人搭枱,我平生最怕同人搭枱,
上次去譚仔,同一對冷戰的情侶搭枱,真係令我尷尬*10.
個日本人老細招呼我坐低,仲叫個我將個手袋同套涼宮春日放係對面張空椅度.
好親切!
之後見我套涼宮擺到搖搖欲墮,仲幫我擺翻正.
好親切!
之後我忍唔住拿套涼宮出黎係咁影相,咔嚓咔嚓咔嚓咔嚓咔嚓,好似好注目咁,
個老板係隔離行過見到,講左句:ああ~~、ハルヒ,
之後用D唔咸唔淡的廣東話問我:[好西利啊,全部?]
我一時聽唔明佢的意思,又要轉翻左日文思考：すごいですね、これ（涼宮春日の憂鬱）全部？
食完飯埋單,佢聊我傾偈,佢又用D唔咸唔淡的廣東話問我套書係度買.
我:係寫樂堂lo,恩平中心果間.(佢好似唔識)sogo上果間旭屋買會好貴啊.
佢:係啊,D yan好貴啊.
我:係啊,100 yan對13.5港紙.
佢:嘩,仲唔止13啊?
我:嗯.你睇唔睇漫畫?
佢:唔睇.好貴.
我即刻笑左,佢個答案太出人意表,我懷疑佢係咪真係聽到明我問咩野.我真係想同佢講句:
日本語ではなしても大丈夫です。
但係咁講好可能會hurt到佢,於是笑笑口,放低錢就走了.
坐上巴士,興奮的心情仍然抑止不止。將套涼宮拿出來,又摩又搓,不時仲要發出低聲呻吟.
不過諗諗下,返到屋企,第一件事就係要將套野拆散佢,分散擺放.
不然被老媽見到見到我又買左一套野.又會俾人哦兩句.
明明係開朗而又有深度的作品,點度搞到好似買左套H咁?
今晚應該將佢放係枕頭底,好好反省下.
